SARATOK, 28 Sept : Bala pengani Rumah Panjai Rengan Bunyat meri terima kasih sereta muji inisiatif Opis Betanam Betupi Sarawak ke udah ngatur Program Nanggam Kaul Komuniti Betanam Betupi (AgriCOP) ba rumah panjai sida.

Tuai Rumah (Tr) Rengan Bunyat, iya nagsaika pekara ke dikunsika bala pengelicha sekumbang program diatur ulih meri peransang ngagai pengani rumah panjai terus ngemansangka diri ba bidang betanam betupi.

“Mayuh endar penguntung ninga utai ditusui ninga utai dipadahka sida ari bala pengelicha nya tadi.

“Berasai amat bisi meransang kami dalam pengawa betanam betupi.

“Sebedau diberi sida penemu enggau jalai betanam betupi ari nya kami tadi bedau ulih maju jauh agi,”ku iya maya dirandau pengudah Program Nanggam Kaul Komuniti Betanam Betupi (AgriCOP) ba Rumah Panjai Rengan Bunyat Selambong, kemari.

Udah nya ba penemu siku agi pengani, Nyawai Guang 62 taun pengawa ngatur program ngaul ejensi perintah baka AgriCOP meri pangka ke besai laban meri peluang ngagai rayat menua pesisir nambahka penemu pasal penerang pemadu baru bekaul enggau isu sereta pekara ke nyadi ngelinggi.

“Peda aku pengawa baka sehari tu endang chukup manah diatur Perintah kitai menua Sarawak GPS baka sehari tu lalu aku ngasaika pengawa baka tu mayuh agi diadu digaga dikena nambah penemu ngagai kitai ba rumah panjai,” ku iya.

Pia mega ba penemu Racha Tingom, iya ngasaika pengawa ngatur program nya ulih meri peransang ngagai orang biak baka iya masuk bidang betanam betupi enggau lebih serius.

“Nengah progam tu kami bisi diterang enggau mendingka ajar pasal online ungkup sesebengkah pekara ke dipungkal ungkup aktiviti betanam betupi.

“Ari program tu kami diajar baka baka ni deka ngulihka bantu ari sebarang raban ke bekaul.

“Nya chukup mantu laban kitai ulih diberi kelala siti utai ke baru ke ulih meri peransang ngagai kitai dikena nguji bidang betanam betupi,” ku terang iya.-TVS