SARATOK, 29 Ogos: Pengawa ngatur Kus Agropreneur Muda Ngasilka Produk Mata deka terus ditegap ba kandang menua pesisir baka di Saratok ditu.

Pemantu Pemansang Raban Bansa Opis Betanam Betupi Saratok Martyne Uted madah, Opis Betanam Betupi Saratok nengah Seksyen Industri Pemun Tani deka terus meri fokus ngagai raban nembiak beumur 40 taun ke baruh nyadi penyereta ba genap renggat kus nya diatur.

“Kitai ngarap ulih terus ngatur kus tu ba sekeda endur ke bukai ngambika ulih nerang pasal Seksyen Industri Pemun Tani.

“Tu mega dikena nambahka penemu enggau nyungkak penatai pemisi asil ari kus ke bisi diatur,” ku iya.

Iya mansutka penerang nya pengudah tembu Kus Agropreneur Muda Ngasilka Produk Mata Terung Dayak di Dewan Serbaguna Taman Seroja Indah Saratok, kemari.

Ku iya, pengawa ngatur kus baka nya mega udah kala diatur ba pelilih Kabong.

Nya alai, ku iya kus ngasilka produk mata ari terung Dayak nya ketiga kali udah diatur nengah Sekseyn Industri Pemun Tani Opis Betanam Betupi Sarawak.

Dulu ari nya, bisi 20 penyereta tebal agi sida ke semina ngibun rumah datai ari empat buah rumah panjai di Saratok udah ngulu Kus Agropreneur Muda Ngasilka Produk Mata Terus Dayak diatur Opis Betanam Betupi Pelilih Saratok.-TVS