SPAOH, 12 Julai: Pengawa ngatur Spaoh Agrofest 2024 pengelama tiga hari berengkah sehari tu, 12 nyentuk Hari Minggu 14 Julai ba Pelaman Spaoh endang pantar pemadu manah dikena komuniti di Betong ngulihka informasyen ke pemadu baru bekaul enggau pengawa diatur ejensi perintah ke bekaul.

ResidenBagi Menua Betong Richard Michael Abu Nawas madah, mensia mayuh ti datai deka bepeluang meda sereta ngulihka penerang sechara terus enggau bala pegawai ejensi perintah ke bisi ngambi bagi.

“Tu endang siti pelasar ngagai mensia mayuh lebih agi di menua Betong tu meda kediri enggau baka ni servis ke diberi ejensi ke bekaul.

“Nyadi kita patut meda peluang tu nengah bansal ke bisi dibuka genap ejensi.

“Tu mega peluang kita betemu terus enggau bala pegawai ke bekaul betanya baka ni servis. Nama pemaik ke ulih diterima kita ari ejensi ke bekaul nyerumba Agrofest di Spaoh taun tu,” ku iya.

Iy madah munyi nya pengudah ngabas taba eksibisyen ba Palan Pengerami Spaoh Agrofest 2024 ditu, pagi tadi.

Tandu iya, bisi 26 ejensi perintah enggau peribit ba Betong bisi ngambi bagi nyengkaum Kaunsil Lada Malaysia (MPB), Institut Kraftjari Menua Kampus Satelit Betong (IKN), Palan Penyulut Enggau Teknikal Sarawak (Centexs), Ejensi Pemansang Bagi Menua Betong (BDDA) enggau ke bukai.

Udah nya iya madah, pengawa nangguhka program nya deka digulu Sapit Premier Sarawak Datuk Amar Douglas Uggah Embas enggau Menteri Industri Pemakai, Komoditi enggau Pemansang Wilayah Sarawak Dato Sri Dr Stephen Rundi Utom enggau ke bukai.

Antara artis ke bisi dikangau merindang sekumbang pengerami tu iya nya raban Masterpiece, Rickie Andrewson, Ramlah Ram, Ramles Walter enggau Amis U.-TVS